تذهب إلى عزاء لتشارك جيران أو أقارب في مناسبة للعزاء , تذهب وأنت مكفهر الوجه عابس القسمات وكأنك أنت الميت...
تدخل تواسي أهل المتوفى وتأخذ نفسك إلى أبعد ركن في المجلس أو القاعة, تحاول جاهدا أن لا تظهر أي معالم لوجهك سوي الاكفهرار...
يدخل شخص لا تعرفه ويواسي أهل المتوفى وفجأة تجده يجلس بجوارك..
السلام عليكم , كيفك وكيف أمورك ويبدأ الحوار
يا أخي أنا بأشبه عليك أنت مش ولد حسن صالح , لأ يا حاج ما أنا , أها أنت ولد منو وغلطة عمرك التي ستكلفك كثيرا بعد هذه الجملة هي أن تقول أنا ولد فلان , ويأتيك الرد يا أخي وأبوك ليه ما جا العزاء عاملي فيها مشغول ولا شنو , أبوك ده من أيام بري وهو شايل نخرته لفوق وما بيشارك الناس في أفراح لا في مآتم...
تقول له بهدوء شديد يا حاج أبوي مات من 15 سنة , يمسك رأسه فجأة ويقول لا آله إلا الله والله ما عرفت إلا حسع دي منك البركة فيكم يا ولدي , حصل ليهو شنو كان مريض ولا كيف..
وتقعد تحكي وتسرد في موضوع مضي عليه 15 عاما وفجأة تجد آخرون تحلقوا حولك وبدءوا يسألوك , أها وأنت متزوج بنت منو وشغال وين وبعدين بعد ما نقلتم من بري رحتم وين...
ويتحول العزاء إلى ونسه...وتخرج من بيت البكاء وأنت قد نسيت أسم المتوفى ونفسك طامة وتبحث ليك عن حبة بناد ول من السافوطة اللي سواها ليك ناس البكاء عفوا ناس الونسة
ليست هناك تعليقات:
إرسال تعليق